შენ გაქვს საშუალება აღმოაჩინო სრულიად ახალი პერსპექტივები. მთავარია პირველი ნაბიჯის გადადგმა და გადაწყვეტილების მიღება, რომ შეცვალო არსებული რეალობა და გამოიყენო ის შესაძლებლობები, რომლებიც დაგეხმარება უკეთესი ცხოვრების დაწყებაში.
ყველაფერი ჯანმრთელობით იწყება. შენი და შენი ოჯახის წევრების ჯანმრთელობა უპირველესი ფასეულობა და ის სიმდიდრეა, რომლის გარეშეც სხვა ყველაფერი ფასს კარგავს. აფხაზეთისა და ცხინვალის რეგიონებში მცხოვრები მოსახლეობისთვის უმაღლესი ხარისხის ჯანდაცვის სერვისებში ჩართვა სრულიად უფასოა. საჭიროების შემთხვევაში, შენ გაქვს შესაძლებლობა მიიღო სხვადასხვა სახის, მათ შორის სპეციალიზებული სამედიცინო მომსახურება და იმკურნალო საქართველოს ნებისმიერ კლინიკაში. შენი და შენი ოჯახის წევრების ჯანმრთელობაზე უმაღლესი დონის პროფესიონალი ექიმები იზრუნებენ.
საკუთარ მომავალზე ზრუნვა ხარისხიანი განათლებას უკავშირდება. სწორედ განათლება გაძლევს თავდაჯერებულობას თავისუფლად მიიღო და დაძლიო ახალი გამოწვევები.თუ სწავლის სურვილი გაქვს, გაეცანი განათლების სხვადასხვა საფეხურზე შექმნილ შესაძლებლობებს, თუ როგორ შეგიძლია შენი ნიჭის, ინდივიდუალური საჭიროებებისა და სამომავლო გეგმების შესაბამისად, მიიღო მაღალი ხარისხის უფასო განათლება. შენ გაქვს შესაძლებლობა დაეუფლო მაღალი ხარისხის უფასო განათლებას ყველა საფეხურზე; ისწავლო საქართველოს საუკეთესო საგანმანათლებლო დაწესებულებებში შენი ნიჭის რეალიზებისთვის, პიროვნული და პროფესიული განვითარებისთვის; მიიღო დაფინანსება და გააგრძელო სწავლა ევროპის და აშშ-ის უნივერსიტეტებში, საბაკალავრო, სამაგისტრო თუ სადოქტორო პროგრამებზე.
უიმედობის განცდას ყველაზე მეტად სოციალური მდგომარეობა და ამ მხრივ პერსპექტივის ნაკლებობა განაპირობებს. შენ გეძლევა რეალური გზა თავი დააღწიო ამ მდგომარეობას და გამოიყენო შესაძლებლობები საკუთარი სოციალურ-ეკონომიკური მდგომარეობის გასაუმჯობესებლად. საკმარისია გქონდეს იდეა და სურვილი ეკონომიკური/ბიზნეს საქმიანობის დასაწყებად და მიიღებ შანსს მოიპოვო სათანადო დაფინანსება მის განსახორციელებლად, განავითარო ახალი სტარტაპი, ჩაერთო ვაჭრობაში, შექმნა საწარმო, მოახდინო პროდუქციის რეალიზაცია სხვადასხვა უდიდეს ბაზრებზე ან/და მოიძიო დაფინანსების დამატებითი წყაროები ბიზნესის განსავითარებლად. ამასთან, შენ გაქვს შესაძლებლობა გაათავისუფლო შენი საწარმო მოგების, საშემოსავლო თუ დამატებითი ღირებულების გადასახადებისგან და ისარგებლო თავისუფალი ვაჭრობის პრივილეგიით.
იცოდე, რომ შენ გაქვს უფლება მიიღო საქართველოს მოქალაქის პასპორტი, რომელიც მოგცემს შესაძლებლობას ყოველგვარი ვიზის გარეშე გადაადგილდე ევროპის და მსოფლიოს უამრავ ქვეყანაში თუ სოციალურ-ეკონომიკური სერვისებით სარგებლობას გეგმავ, შენ ასევე შეგიძლია სახლიდან გაუსვლელად გაიარო მარტივი რეგისტრაცია და სრულიად ნეიტრალური ფორმით, ყოველგვარი დოკუმენტაციის გარეშეც თავისუფლად ისარგებლო შენთვის შექმნილი პროგრამებით.
არ დაგავიწყდეს, მთავარია სურვილი, რომ გადადგა პირველი ნაბიჯი და შენ კიდევ უამრავ სხვა შესაძლებლობას აღმოაჩენ შენი და შენი ოჯახის კეთილდღეობისა და უკეთესი მომავლისთვის.
